Rematando traballos

Xa temos unha nova gaita rematada, en madeira de cocobolo con doble anelado en buxo. Deixovos unhas fotos nas que podedes ver a gaita e ó seu feliz constructor.

Prsentación do disco Pito Galego

Lembrovos que o próximo día 12 ás 18:30 no auditorio da ETRAD presentarase o disco Pito Galego, de Efraín Díaz, o primeiro disco dedicado íntegramente a este fermoso instrumento. Non faltedes.

Primeiro Pito Galego Tenor de Re. Coventina.Efraím Díaz

Aqui tedes o fantástico traballo de investigación de Miguel Mosquera, antigo alumno deste obradoiro, artesán de gaitas e frautas galegas, logo de conseguir os pitos en DO, Sib e SOL, presentanos agora o pito tenor en RE. Escoitade esta preciosidade.
O interprete e Efrain Díaz, que está preparando un disco integramente de pito pastoríl.

Pito Galego. O Método. Presentación

Por fin, o pasado venres 23 de outubro tivemos na hemeroteca da escola a presentación do método para pito galego de Moisés Quintas.
Contamos coa presenza de J. Aldea, da editorial Ouvirmos, responsable da súa publicación; Antón Corral, un dos baluartes da recuperación deste fermoso instrumento, que fixo un pequeno e interesante repaso polo traballo de recuperación a partir de Basilio Carril; e finalmente unha pormenorizada explicación do propio libro por parte do seu autor Moisés Quintas.
O final do acto Moisés, acompañado de Viqui, interpretaron catro pezas con diferentes pitos e percusión que fixeron as delicias do publico.
Por suposto agradecer ós tres a súa presenza na nosa escola, coma sempre o meu agradecemento a Mª Jesús, a nosa bibliotecaria que que fai o imposible por que todo saia ben, a Marian, mestra de encaixe de palillos e diseñadora, que nos diseñou e fixo o cartel en tempo record e a Pepe Pereira, mestre de artesanía do coiro, porque sempre está, faga falta ou non.
Agora é o voso turno, mercar o libro e visitar a web, de seguro que estaredes encantados.

Presentación do método web e físico: Pito Galego

Por fin teremos a presentación do método: Pito Galego - Método práctico.

Este proxecto sae á luz con dous formatos: web e papel, a versión en papel esta editada pola editorial ouvirmos.

A presentación será o vindeiro día 23 de outubro ás 19:00 h. na hemeroteca da escola. Animádevos a vir.

A continuación deixovos un pequeno texto descriptivo do libro, e unha pequena reseña sobre o seu autor: Moisés Quintas

Pito Galego: Método Práctico

Un libro e unha web forman o proxecto “Pito Galego”.

Nos dous formatos complementarios, fálase da orixe e evolución do instrumento e faise un estudo riguroso dos distintos pitos. Adxúntanse fotografías, máis de 250 gravacións de audio, máis de 200 exercicios progresivos, técnica, articulación, afinación, respiración… máis de 50 melodías tradicionais galegas (Alalás, Alboradas, Muiñeiras, Pandeiradas …) ordenadas por grao de dificultade, un obradoiro para construír o teu propio Pito de cana e moito máis… Son as palabras do mestre artesán Antón Corral as que abren este método, unha das persoas máis relevantes no mundo da Música Tradicional Galega, e a quen, sen dúbida, debemos a recuperación e perfeccionamento do Pito Galego.

Moisés Quintas:

Afeccionado á música dende neno, estuda guitarra e frauta traveseira nos conservatorios de Ourense, Cádiz e Vigo. É compoñente e membro fundador de distintas formacións musicais como Arco da Vella ou Trasmundi, coas que edita varios traballos discográficos. Tamén como frautista e guitarrista ten colaborado e gravado con distintos grupos folk como: Xeque Mate, Malvela ou Tino Baz. No ano 2011 coa editorial Ouvirmos publica a "Guía Didáctica de Instrumentos Galegos", un libro-CD con audio e pista interactiva en formato web, que presenta unha exhaustiva clasificación e descrición dos instrumentos galegos e as súas partes, coa súa etimoloxía, orixe e evolución. En maio de 2015 publica un método online en formato web para a aprendizaxe do Pito Galego con fotografías, audios, exercicios progresivos e máis de 50 melodías tradicionais galegas, recentemente editado en libro pola Editorial Ouvirmos

Na actualidade compaxina a súa profesión de docente na área de Educación Musical con seminarios, recollida de música tradicional, concertos, composición e arranxos musicais, ao tempo que desenvolve traballos didácticos sobre distintos instrumentos.

Charlas Didácticas

Deixovos esta información que me acaba de mandar Pablo Carpintero, un maestro na reconstrucción de gaitas antigas, que vai abrir as portas do seu Museo-Obradoiro para dar unhas charlas certamente interesantes.

CHARLAS NO MUSEO-OBRADOIRO DE PABLO CARPINTERO

Preséntovos un ciclo de dez charlas didácticas, moitas delas son charlas-concerto, outras obradoiros didácticos, pero todas versan sobre música en xeral e música galega en particular. O obxectivo é divulgar o que fomos aprendendo nestes últimos anos sobre diversos aspectos da música e dos instrumentos musicais, para elo, ademais das explicacións faladas, poderedes escoitar os instrumentos musicais en directo, acompañados de explicacións e imaxes e, nalgúns casos, aprender a tocalos e construílos.

As charlas celebraranse na meu obradoiro-museo, en Meixonfrío (Santiago de Compostela) e serán sempre os domingos pola mañá, dende as 11:00 ás 12:30 aproximadamente.

As prazas están limitadas a un máximo de 25 persoas. Asistir ten un custo de 12 euros por persoa. Podes reservar xa a túa praza para a charla ou charlas que queiras. Para apuntarte escrebe ao meu correo: pablo.carpin@gmail.com indicando o teu nome e a charla ou charlas ás que queres asistir, ou chámame directamente a este teléfono: 626588381.

O programa é o seguinte:

1. As gaitas de fol no noroeste da península Ibérica. Dezaseis gaitas de fol diferentes, réplicas ou antigas, que percorren a variedade de gaitas que existe desde Sesimbra ata Asturias, co seu repertorio, percusión e técnicas particulares, explicadas nunha charla dunha hora e media de duración.

Data: 18 de outubro

2. Sobre as orixes da música. Nos últimos vinte anos a neuroloxía, etnomusicoloxía e a historia teñen avanzado moito no que respecta ao coñecemento do que é en realidade a música entendida como a suma de canto, baile e música instrumental. Explicaremos as últimas teorías sobre a orixe da música, así como a súa relación evolutiva coa linguaxe falada. Tamén repasaremos os instrumentos musicais máis antigos achados ata a data, os seus representantes actuais galegos e as implicacións que teñen.

Data: 15 de novembro

3. As cadeas evolutivas de instrumentos musicais en Galiza. Entre os máis de 150 instrumentos musicais achados en Galiza atopamos cadeas evolutivas que nos conectan directamente con tempos moi antigos, principalmente a través dos instrumentos que fabricaban os nenos e as nenas. Que significa isto? Que implicacións históricas ten?

Data: 13 de nadal.

4. Os instrumentos musicais femininos, orixe e evolución en Galicia. As mulleres galegas son depositarias dun coñecemento ancestral, o xeito de cantar e os instrumentos empregados son en moitos casos reliquias de tempos moi antigos, por que?

Data: 10 de xaneiro

5. As trompas. Instrumentos chamánicos reliquias de tempos pretéritos. Houbo chamáns en Galicia? Como son as nosas trompas? Con que trompas teñen que ver as Galegas? Como se toca unha trompa galega?

Data: 31 de xaneiro

6. Instrumentos musicas de palla. Un obradoiro didáctico. De onde veñen? Que significado histórico teñen? Como se constrúen?

Data: 21 de febreiro

7. As palletas. Este elemento é a alma de óboes e clarinetes, pero, que tipos de palletas existen en Europa? En que aspectos as palletas do noroeste peninsular son orixinais? Por que se chaman palletas? Como se constrúían as palletas antigas? Que aporta este coñecemento ao coñecemento da orixe das gaitas de fol?

Data: 6 de marzal

8. A orixe das gaitas de fol. Unha nova hipótese desenvolvida en base aos diferentes tipos de lingüetas que se achan en África e Europa, e que explica os achados iconográficos, históricos e organolóxicos, con audicións de moi diferentes tipos de gaitas de fol.

Data: 3 de abril

9. As gaitas de fol e os instrumentos aerofonos medievais. Unha nova hipótese baseada en experimentos con réplicas de gaitas á partir da iconografía que nos axudará a entender a xénese das nosas gaitas de fol e doutros instrumentos musicais, así como a súa importancia en Europa.

Data: 1 de maio

10. As gaitas de Pontevedra a finais do século XIX. No Museo de Pontevedra agardaba unha cápsula do tempo: gaitas, palletas, ferramentas, gravacións, partituras... ven a descubrir que teñen que ver as gaitas de Villanueva, a súa particular técnica e repertorio, coas gaitas medievais e coa orixe da muiñeira

PITO GALEGO, O método agora tamén en papel

Acabamos de enviar á imprenta o primeiro método de pito galego, o autor Moisés Quintas. Un libro que contribuirá a mostrar as posibilidades musicais deste instrumento e facilitará a súa aprendizaxe. Emprega unha metodoloxía progresiva e baseada no noso repertorio tradicional. Resitúa así o pito no lugar que lle corresponde dentro da música galega ao tempo que recolle a tradición construtora dos mestres artesáns Basilio Carril, Paulino Pérez e Antón Corral.

Próximamente teremos na nosa escola ó seu autor, Moisés Quintas, para presentarnolo.

Basilio Carril traballando no obradoiro.

http://youtu.be/xGLLkZwFNF8

Catalogación de zanfonas antigas de Galicia

Hoxe tivemos o inmeso pracer de recibir a Luciano Pérez, responsable do Centro de Artesanía e Deseño de Lugo, que está a facer un fermoso traballo de catalogación das zanfonas antigas de Galicia.
Na Emao temos dous exemplares destas zanfonas, polo que Luciano, co seu equipo técnico e humán, pasou a mañán fotografiando exteriormente as zanfonas para, logo dun proceso informatico, facer fotografías en 360º e interactivas. Tammén, axudandose dunha microcámara, fotografiaron o interior das dúas zanfonas. Un bonito e interesante traballo a prol da conservación do legado cultural de Galicia.
Gracias Luciano.

Seguimos rematando traballos

Aqui temos a Alfredo coa súa gaita rematada (agás o punteiro, que e de outra gaita).
Fermosa en buxo con doble anelado en granadillo e anelas e espigos en latón